Ona tilimiz — milliy o‘zligimiz va ma’naviyatimiz timsoli!
Respublika ixtisoslashtirilgan kardiologiya ilmiy-amaliy tibbiyot markazi Qarshi filialida 21 oktabr — O‘zbek tiliga davlat tili maqomi berilgan kun munosabati bilan ma’naviy-ma’rifiy tadbir tashkil etildi.
Tadbirni filial direktori Ya.R. Axmatov ochib berdi. U o‘z so‘zida ona tilimizning millat hayotidagi beqiyos o‘rni, uning davlat tili sifatidagi nufuzini yuksaltirish, milliy qadriyatlarimizni asrab-avaylash hamda yosh avlod qalbida ona tiliga bo‘lgan hurmat va e’tiborni yanada mustahkamlash muhim ahamiyatga ega ekanligini ta’kidladi.
Tadbir davomida soha faxriylari ham so‘zga chiqib, o‘zbek tilining boy tarixi, jozibadorligi, ma’naviy qadriyatlarimizni saqlashdagi ahamiyati haqida o‘z fikr-mulohazalari bilan o‘rtoqlashdilar. Ular o‘z hayotiy tajribalari va ibratli fikrlari orqali yosh avlodni ona tilini qadrlashga, uning sofligini asrashga chaqirdilar.
Ta’kidlash joizki, 1989 yil 21 oktabrda «Davlat tili haqida»gi Qonunning qabul qilinishi o‘zbek xalqining milliy o‘zligini anglash, ma’naviy qadriyatlarini asrab-avaylash va ona tilining jamiyat hayotidagi o‘rnini mustahkamlash yo‘lidagi muhim tarixiy voqea bo‘ldi.
Bugungi kunda davlat tilining nufuzini oshirish, uning sofligini saqlash, ish yuritish va rasmiy hujjatlarda adabiy til me’yorlariga rioya qilish har bir tashkilot va muassasaning muhim vazifalaridan biri hisoblanadi.
Shu jumladan, tibbiyot sohasida ham bemorlar bilan ona tilimizda samimiy va tushunarli muloqot qilish, ularga zarur ma’lumotlarni o‘zbek tilida yetkazish sifatli tibbiy xizmat ko‘rsatishning muhim omillaridan biridir.
Tadbir ko‘tarinki ruhda o‘tib, ishtirokchilarda ona tilimizga bo‘lgan hurmat va iftixor tuyg‘ularini yanada mustahkamlashga xizmat qildi.
Ona tilimizga bo‘lgan hurmat — Vatanga bo‘lgan hurmatdir!
Ona tilimiz doimo barhayot, qadr-qimmati va nufuzi yuksak bo‘lsin!
